ఆంధ్రప్రదేశ్‌ను కార్పోరేట్ హోంగా మార్చుకోండి
ట్రేడ్, టెక్నాలజీ, ట్రస్ట్‌కు వాస్తవ రూపమిస్తాం
పారిశ్రామికవేత్తలకు ఫోన్ కాల్ దూరంలో ఉంటాం
మీతో కలిసి పనిచేయడానికి ఆసక్తిగా ఉన్నాం
మీ సొంత టీములకంటే మేం వేగంగా స్పందిస్తాం
సీఐఐ 31వ పార్టనర్ షిప్ సమ్మిట్‌లో విద్య, ఐటీ, ఎలక్ట్రానిక్స్, ఆర్టీజీఎస్ శాఖల మంత్రి నారా లోకేష్
విశాఖపట్నం: గ్లోబల్ పారిశ్రామికవేత్తలు ఆంధ్రప్రదేశ్ ను కేవలం సందర్శించడమే గాక ఇక్కడ పెట్టుబడి పెట్టండి, ఆవిష్కరించండి, ఎదగండి. ఇక్కడ కేవలం మీ ఫ్యాక్టరీలు మాత్రమే నిర్మించకండి. ఆంధ్రప్రదేశ్ ను మీ కార్పోరేట్ హోమ్ గా చేసుకోవాలని విద్య, ఐటీ, ఎలక్ట్రానిక్స్, ఆర్టీజీఎస్ శాఖల మంత్రి నారా లోకేష్ పిలుపునిచ్చారు. విశాఖపట్నం ఆంధ్రా యూనివర్సిటీ గ్రౌండ్స్ లో సీఐఐ 31వ పార్టనర్ షిప్ సమ్మిట్ పారిశ్రామిక దిగ్గజాల కోలాహలం నడుమ అట్టహాసంగా ప్రారంభమైంది. ఈ సందర్భంగా మంత్రి నారా లోకేష్ మాట్లాడుతూ… ఈ సదస్సులో మనం ట్రేడ్, టెక్నాలజీ, ట్రస్ట్ గురించి మాట్లాడుతున్నాం. ఆంధ్రప్రదేశ్ లో, ఈ మూడు పదాలకు వాస్తవ రూపమిచ్చి పెట్టుబడులు, భాగస్వామ్యాలు, అవకాశాలుగా మార్చాలనుకుంటున్నాం. మా ప్రభుత్వ పూర్తి మద్దతు మీకు ఉంది. మా తలుపులు మీ కోసం ఎల్లప్పుడూ తెరిచే ఉంటాయి, మా టీమ్‌లు ఎల్లవేళలా సిద్ధంగా ఉంటాయి. మీతో కలిసి పని చేయడానికి మేము ఆసక్తిగా ఎదురు చూస్తున్నాం. ఆంధ్రప్రదేశ్ ను ఆస్వాదించండి. మీరు తిరిగి వెళ్ళేటప్పుడు జ్ఞాపకాల కంటే ఎక్కువ తీసుకెళ్లండి. ఇక్కడి నుంచి మీ భవిష్యత్తును నిర్మించుకోవడానికి ఒక ప్రణాళికను తీసుకెళ్లండి. మా తరపున వంద శాతం మద్దతు మీకు ఉంటుంది. అని పారిశ్రామికవేత్తలకు మంత్రి లోకేష్ భ‌రోసా ఇచ్చారు.
ఇదీ మా బ‌లం-మా ధైర్యం
మాకు వెయ్యి కిలోమీటర్లకు పైగా తీరప్రాంతం ఉంది. విశాఖపట్నం ప్రధాన పోర్టు, మా ఇతర పోర్టులు ఇప్పటికే సంవత్సరానికి సుమారు 10 కోట్ల టన్నుల కార్గోను నిర్వహిస్తున్నాయి. రామాయపట్నం, మూలపేట, మచిలీపట్నం, కాకినాడలలో నాలుగు కొత్త గ్రీన్‌ఫీల్డ్ పోర్టులు నిర్మాణంలో ఉన్నాయి, దీంతో ఈ సామర్థ్యం రెట్టింపు కాబోతోంది. ఈ వారంలో మీలో చాలా మంది మా కొత్త అల్లూరి సీతారామరాజు అంతర్జాతీయ విమానాశ్రయం, భోగాపురంలో దిగారు. ఈ ఎయిర్ పోర్టు ఆగస్టులో ప్రారంభమైంది. దీనికి 3,800 మీటర్ల రన్‌వే ఉంది, ఇది భారీ విమానాల కోసం నిర్మితమైంది. భారతదేశ విమానయాన మౌలిక సదుపాయాలను బలోపేతం చేయడంలో నిరంతరం మద్దతు ఇస్తున్న గౌరవ ప్రధానమంత్రి నరేంద్ర మోదీజీకి, ఈ ప్రాజెక్టును ముందుకు తీసుకెళ్లడంలో కృషి చేసిన కేంద్ర పౌర విమానయాన శాఖ మంత్రి రామ్మోహన్ నాయుడుకి, ఈ కలను నిజం చేసిన జీఎంఆర్ కు నా హృదయపూర్వక ధన్యవాదాలు.
ఐటి సిటీగా విశాఖపట్నం
భారతదేశంలోని దాదాపు 60 శాతం ఎయిర్ కండిషనర్లు ఏపీ శ్రీసిటీలో ఒకే చోట తయారవుతాయి. భారతదేశ సముద్ర ఆహార ఎగుమతుల్లో పరిమాణం ప్రకారం సుమారు మూడో వంతు మా తీరం నుంచే వస్తుంది. రొయ్యల ఎగుమతుల్లో సుమారు 80 శాతం మా ఫార్మ్‌ల నుంచే వస్తుంది. భారతదేశ కోకోలో 40 శాతానికి పైగా మేమే పండిస్తాం. దేశంలో పండే ఎండు మిర్చిలో 40 శాతానికి పైగా గుంటూరు ప్రాంతం నుంచే వస్తుంది, అందుకే మా ఆహారం ఘాటుగా ఉంటుంది. ఆంధ్రప్రదేశ్ భారతదేశ ఫ్రూట్ బౌల్. దేశంలోనే పండ్ల ఉత్పత్తిలో అతిపెద్ద రాష్ట్రం ఏపీ, జాతీయ ఉత్పత్తిలో సుమారు 16 శాతం వాటా మాదే. చేపలు, గుడ్ల ఉత్పత్తిలో కూడా భారతదేశంలో మేమే మొదటి స్థానంలో ఉన్నాం. భారతదేశ ఎఫ్‌సీవీ పొగాకులో సగానికి పైగా ఆంధ్రప్రదేశ్ నుంచే వస్తుంది. మా ఫ్యాక్టరీలే మా సామర్థ్యానికి నిదర్శనం. 2019లో కియా అనంతపురంలో ఉత్పత్తి ప్రారంభించినప్పటి నుంచి ఆ ప్లాంట్ నుంచి దాదాపు 19 లక్షల కార్లు బయటకు వచ్చాయి, అవి 90కి పైగా దేశాలకు ఎగుమతి అవుతున్నాయి. ఇదే సమయంలో విశాఖపట్నం ఐటీ సిటీగా మారుతోంది. జనవరిలో ఇక్కడ కాగ్నిజెంట్ ప్రారంభమైంది, దాని శాశ్వత క్యాంపస్ సుమారు 25,000 మంది కోసం ప్రణాళిక రూపొందించారు. టీసీఎస్ కూడా ఇక్కడ ప్రారంభమైంది.